Gáfust upp á biðinni

Rúmlega þrjátíu þúsund manns hafa nú skrifað undir lista á netinu þar sem Alþingi er hvatt til að samþykkja ekki frumvarp um lækkun veiðigjalds.

Þrjátíu þúsund er sú tala sem forseti Íslands, Ólafur Ragnar Grímsson, miðaði við þegar hann synjaði fjölmiðlalögum staðfestingar árið 2004 og talaði þá um gjá milli þings og þjóðar.

Formaður atvinnuveganefndar Alþingis ætlar að kalla forsvarsmenn undirskriftasöfnunarinnar, þá Ísak Jónsson og Agnar Þorsteinsson, á fund nefndarinnar í dag. Sá fundur fór ekki eins og ráð var fyrir gert.

„Við biðum þarna á biðstofu nefndarinnar í um 25 mínútur, sem er vel handan við hið akademíska korter, og þá þurftum við að mæta til vinnu og við létum fólk vita af því,“ segir Ísak sem bætir við að hann hafi ekki vitað hvað það var sem nefndin vildi ræða við þá félaga.

„Annars er okkar meining í þessu máli ekkert mikilvægari en annarra. Við erum bara tveir af þrjátíu þúsund,“ segir Ísak. „Þeir hefðu allt eins getað kallað einhverja af hinum á fundinn,“ bætir hann við.

Ísak fagnar áfanganum, segir þá hafa að stefnt að 30 þúsund undirskriftum en hvetur jafnframt fólk til að halda áfram að skrifa undir; hann viti að fjölmargir deili þessari skoðun. Nýjustu fréttir eru svo þær að Sigurður Ingi Jóhannsson sjávarútvegsráðherra  boðaði þá félaga á sinn fund nú skömmu fyrir hádegi.