Vissi um ástand ökumannsins - bætur lækkaðar verulega

Bætur til konu sem lenti í umferðaróhappi í desember árið 2009 voru lækkaðar allverulega í Héraðsdómi Reykjavíkur í gær í ljósi þess að farþeginn vissi um ástand ökumannsins, sem var undir áhrifum amfetamíns og kannabisefna.

Konan stefndi ökumanninum og tryggingafélaginu en þess var krafist að konunni yrðu greiddar tæplega 4 milljónir króna í skaðabætur út af óhappinu.

Slysið atvikaðist með þeim hætti að ökumaðurinn, sem var kona, var að leita að logandi sígarettu í aftursæti bifreiðarinnar þegar hún ók á ljósastaur.

Í niðurstöðu Héraðsdóms Reykjavíkur kemur fram að konan hafi sýnt af sér stórfellt gáleysi með því að setjast upp í bílinn.

Var niðurstaðan því sú að lækka bætur úr tæplega fjórum milljónum niður í tæplega 700 þúsund krónur.