Lokað í Lánasjóðnum vegna veðurs

Landsmenn á suðvesturhorninu hafa tekið veðurblíðunni fagnandi í dag. Hlýtt er úti og fólk gerir hvað það getur til að njóta veðurblíðunnar.

Hið sama á við um starfsmenn LÍN sem er líkast til úti í góða veðrinu, en svo virðist sem óvinnufært hafi verið á skrifstofu lánasjóðsins vegna veðurs.

Þetta kemur fram á forláta blaði sem er á hurð á skrifstofu lánasjóðsins, sem er staðsett í Borgartúni. Þeim sem þurfa að skila inn gögnum til sjóðsins er bent á að skilja þau eftir í póstkassa sem er staðsettur í anddyri LÍN, en þar mun enginn vera til viðtals.

Engum sögum fer af því hvort aðrar stofnanir eða fyrirtæki á höfuðborgarsvæðinu hafi þurft að bregða á sama ráð vegna veðursins, en sennilega er starfsfólk lánasjóðsins ekki í áfalli vegna þessa.

Veðrið um helgina verður líkast til þurrt og hlýtt samkvæmt upplýsingum frá Veðurstofunni. Hiti verður á bilinu 10 - 18 stig og hlýjast verður norðaustantil.