Langaði í ískalda kók

Oftar en ekki eru ökumenn með skýringar á reiðum höndum þegar þeir eru staðnir að hraðakstri.

Í tilkynningu frá lögreglu segir að margir segjast ekki hafa verið að fylgjast með hraðamælinum, en jafnframt álitið sig aka mun hægar en hraðamæling lögreglunnar segir til um.

Karl á þrítugsaldri, sem lögreglan stöðvaði vegna hraðaksturs á höfuðborgarsvæðinu á dögunum, var hins vegar ekkert að þræta um hraðamælinguna og sagði hreint út að hann hefði verið á hraðferð.

Spurður nánar sagði maðurinn að hann hefði orðið þyrstur og því ekið beinustu leið að næstu sjoppu til að fá sér ískalda kók. Áður en þangað kom stöðvaði lögreglan för mannsins, en bíll hans mældist á 68 km hraða þar sem leyfður hámarkshraði er 30.

Maðurinn, sem hefur áður verið tekinn fyrir hraðakstur, var í kjölfarið sviptur ökuréttindum til bráðabirgða.