Aðstoðarkonan segist hafa sent fundarboðið

Helga Sigurrós Valgeirsdóttir, aðstoðarkona Sigurðar Inga Jóhannssonar sjávarútvegs- og landbúnaðarráðherra, segist í yfirlýsingu sem hún sendi fjölmiðlum síðdegis hafa boðað til fundarins við forsvarsmenn undirskriftarsöfnunar um óbreytt veiðigjald. Það hafi því ekki verið ráðherra sem boðað til fundarins.

Hart var deilt á Sigurð Inga Jóhannsson sjávarútvegs og landbúnaðarráðherra á Alþingi í dag eftir að afrit af fundarboði til aðstandenda undirskriftarsöfnunar varðandi breytingar á veiðigjaldi var sent á yfirboðara eins þeirra Agnars Kristjáns Þorsteinssonar.

Aðstoðarkona Sigurðar Inga hefur sent frá sér yfirlýsingu vegna málsins:

„Upphaflega reyndi ég að ná í forsvarsmenn söfnunarinnar í síma en án árangurs. Þeir höfðu áður komið fram í fjölmiðlum undir nafni og mér var því kunnugt um hverja ég vildi ná í.  Í framhaldi af því reyndi ég að finna netföng sem ég gæti haft samband við.  Ég sendi á tvö netföng sem ég fann og taldi tilheyra viðkomandi aðila. Í pósti mínum ávarpa ég með bæði upphafs og millinafni og býð til fundar með ráðherra og mæli fyrir tíma.

Mér finnst afar leitt, að komið hefur í ljós, að annað netfangið sem ég taldi vera rétt tilheyrði yfirmanni þess aðila sem ég vildi ná sambandi við. Ætlun mín var engin í þá átt að tala við nokkurn annann en hann eða sverta eða reyna að koma á óorði að nokkru leyti. Ráðherra var sjálfur ekki staðnum, en bað mig fyrir verkinu. Ég ber virðingu fyrir fólki sem hefur hugsjón og sýnir þjóðfélagsmálum áhuga. Um hrein mistök af minni hálfu var að ræða, ég átti rösklegan dag í gær, ég vandaði ég ekki nægilega til verka og gerði mistök. Ég bað viðkomandi afsökunar um leið og mér var málið kunnugt, þ.e. á opnum fundi um undirskriftarsöfnunina í dag og óska þess að þetta hafi ekki neikvæðar afleiðingar fyrir hann.

Með fyrirfram þökk, Helga Sigurrós Valgeirsdóttir, aðstoðarmaður sjávarútvegs- og landbúnaðarráðherra“