Óttast að ESB málið verði drepið og viðræður aldrei kláraðar

Viðbótarkostnaður vegna þjóðaratkvæðagreiðslu um framhald aðildarviðræðna við Evrópusambandið samhliða sveitarstjórnarkosningum yrði óverulegur með hliðsjón af heildarkostnaði við kosningarnar. Þingflokkur Samfylkingarinnar hefur lagt fram þingsályktun en óvíst er hvaða stuðnings hún nýtur meðal stjórnarþingmanna.

Þingflokkur Samfylkingarinnar eins og hann leggur sig, níu þingmenn, hefur lagt fram þingsályktunartillögu um þjóðaratkvæðagreiðslu um framhald viðræðna um aðild Íslands að Evrópusambandinu.

Tillagan gengur út á að undirbúa þjóðaratkvæðagreiðslu um framhald viðræðna um aðild Íslands að Evrópusambandinu sem fram fari samhliða sveitarstjórnarkosningum vorið 2014.

Þessi útfærsla er athyglisverð fyrir þær sakir að forsætisráðherra viðraði sjálfur sömu hugmynd á fundi VÍB, eignastýringar Íslandsbanka, rétt fyrir kosningar.

Á fundinum var stefna fyrir atvinnulífið á dagskrá en þar var rætt um áframhald aðildarviðræðna við ESB. Sigmundur Davíð Gunnlaugsson spurði þá fundarstjóra hvernig honum litist á að halda þjóðaratkvæðagreiðslu samhliða sveitarstjórnarkosningum á næsta ári, en lýsti því ekki beint yfir hvort hann teldi það æskilegt. Hann svaraði í raun spurningu fundarstjóra með annarri spurningu.

Lofuðu báðir stjórnarflokkarnir ekki þjóðaratkvæðagreiðslu um framhald viðræðna?

Báðir stjórnarflokkarnir höfðu slíka atkvæðagreiðslu á stefnuskrá sinni. Í kosningastefnu Sjálfstæðisflokksins segir: „Kjósendur ákveði í þjóðaratkvæðagreiðslu á kjörtímabilinu hvort aðildarviðræðum skuli haldið áfram.“ Flokksforystan ítrekaði síðan að slík atkvæðagreiðsla yrði haldin á fyrri hluta kjörtímabilsins. Í stefnu Framsóknarflokksins segir: „ekki verði haldið lengra í aðildarviðræðum við Evrópusambandið nema að undangenginni þjóðaratkvæðagreiðslu.“

Þeir sem vilja ljúka aðildarviðræðunum óttast að stjórnarflokkarnir tveir muni ekki efna þetta og í raun verði málið drepið, en aðildarviðræðurnar voru efnislega stöðvaðar í síðustu viku og starf samninganefnda stöðvað þótt í stjórnarsáttmála sé talað um „hlé.“ Óvíst er hvaða stuðnings þingsályktunartillagan nýtur meðal stjórnarþingmanna, en þeir sem fréttastofa ræddi við í dag vildu ekki tjá sig um hana.

Þær upplýsingar fengust frá innanríkisráðuneytinu í dag að kostnaður við að halda þjóðaratkvæðagreiðslu samhliða sveitarstjórnarkosningum þýddi að útbúa þyrfti tvær kjörskrár og auka kjörseðil. Það má því áætla að prentkostnaður muni tvöfaldast. Eftir því sem fréttastofa kemst næst væri kostnaðaraukningin óveruleg með hliðsjón af heildarkostnaði vegna kosninganna, en hún hlypi samt á tugum milljóna króna.