Vestfirðir verða áfram í forgangi

Ráðist verður í Dýrafjarðargöng eftir þrjú ár, segir Hanna Birna Kristjánsdóttir innanríkisráðherra, sem segir að uppbygging vegakerfisins á Vestfjörðum verði áfram forgangsmál.

Vestfirðingar telja sig búa við verri vegi en aðrir landsmenn og þeir spyrja hvort ný ríkisstjórn muni, eins og síðasta ríkisstjórn, setja þennan landshluta í forgang. Þriggja milljarða króna verk í Kjálkafirði og Kerlingarfirði, sem er langstærsta vegagerðin í landinu um þessar mundir, er dæmi um áhersluna sem lögð er á Vestfirði.

Hanna Birna segir það alveg klárt og skýrt, í viðtali sem tekið var á sunnanverðum Vestfjörðum, að þessi hluti fjórðungsins verði í forgangi.

Á annað hundrað Vestfirðinga sem mættu til málsþings á Tálknafirði á föstudag fýsti einnig að vita hvort staðið yrði við áform um Dýrafjarðargöng. En verða þau næst í röðinni?

„Þau eru á áætlun 2016. Við hljótum að miða við það," segir Hanna Birna meðal annars í viðtali í fréttum Stöðvar 2.

Nýr ráðherra vegamála boðar þó vissar áherslubreytingar, að meira verði lagt í viðhald og þjónustu fremur en nýframkvæmdir.