Umfjöllun, viðtöl og einkunnir: FH - Fylkir 2-1 | Bið Fylkis lengist enn

FH náði í þrjú mikilvæg stig á heimavelli þegar liðið lagði Fylki 2-1 í Pepsí deild karla í fótbolta í kvöld. Fylkir var 1-0 yfir í hálfleik.

Fylkir fékk sannkallaða óskabyrjun þegar Andrés Már Jóhannesson skoraði strax á 5. mínútu úr sinni fyrstu sókn.

Fylkir stjórnaði ferðinni í fyrri hálfleik og hélt hraðanum niðri. FH náði ekkert að skapa sér og var forystu Fylkis í hálfleik verðskulduð.

FH jók hraðann strax í upphafi seinni hálfleiks og var mun meiri þungi í sóknum liðsins. Liðið fékk nokkur ágæt færi en mörkin tvö komu bæði eftir hornspyrnu.

Fylkir náði ekkert að ógna marki FH í seinni hálfleik og náði lítið sem ekkert að halda boltanum innan liðsins. FH réð ferðinni algjörlega en varnarmenn Fylkis stóðu sig þó vel í því að hindra að FH fengi mörg opin færi.

Atli Viðar Björnsson fékk þó eitt dauðafæri seint í leiknum en Bjarni Þórður bjargaði því að FH gerði út um leikinn.

FH minnkaði forystu KR á toppi deildarinnar niður í þrjú stig á nýjan leik en Fylkir er sem fyrr í næst neðsta sæti með aðeins tvö stig og enn án sigurs.

Björn Daníel: Værum vitlausir ef við myndum hætta að hlusta á Heimi

„Mér fannst við ekki góðir í fyrri hálfleik en komum ákveðnir til leiks í seinni hálfleik og sýndum í hvað okkur býr,“ sagði Björn Daníel Sverrisson miðjumaður FH sem lék vel að vanda og skoraði sigurmark FH.

„Mér fannst við spila vel í seinni hálfleik og létum boltann ganga. Þegar við náum upp góðu spili þá fylgja því mörk.

„Við spiluðum hægt í fyrri hálfleik og leyfðum þeim að hægja á okkur. Fyrir utan þetta mark hjá þeim var samt lítið að gerast.

„Heimir talaði um það í hálfleik að við þyrftum að setja meira í þetta og vinna návígi. Mér fannst við gera það frá byrjun seinni hálfleik og ég er virkilega sáttur við spilamennskuna í seinni hálfleik,“ sagði Björn Daníel sem gerði lítið úr ummælum Heimis Guðjónssonar þjálfara eftir tapið gegn Stjörnunni í bikarnum fyrir helgi þar sem Heimir efaðist um að hann næði til hópsins.

„Hann náði til okkar og hann nær alltaf til okkar. Við höfum ekkert rætt þessi ummæli hans innan hópsins. Við værum mjög vitlausir ef við myndum hætta að hlusta á hann núna eftir að hann hefur skilað Íslandsmeistaratitlum og bikarmeistaratitli til félagsins,“ sagði Björn sem skoraði glæsilegt skallamark í leiknum en hann hefur verið mjög drjúgur með enninu að undanförnu.

„Ég veit ekki hvað er í gangi. Ég hef ekki verið neitt sterkur í hornspyrnum en það er gaman að skora sigurmark.

„Ég ætlaði að koma á nær en breytti og ákvað að koma á fjær og svo lenti boltinn þar. Ég var búinn að eiga einn skalla þar sem var bjargað á marklínu. Ég var bara ánægður að þessi fór inn,“ sagði Björn Daníel að lokum.

Ásmundur: Geri það sem ég tel sterkast fyrir liðið

„Menn lögðu allt í sölurnar. Það var flott barátta í liðinu og skipulagið hélt vel. Við gáfum fá færi á okkur og heilt yfir get ég hrósað strákunum en ég er svekktur að tapa leiknum á tveimur mörkum eftir hornspyrnur,“ sagði Ásmundur Arnarsson þjálfari Fylkis.

„Seinni hálfleikur var ekki eins góður og sá fyrri og það dró aðeins af mönnum. Það munar um að missa mann eins og Andrés (Má Jóhannesson) af velli sem er að koma til baka eftir sín meiðsli. Það dregur aðeins úr okkur og menn verða full stressaðir í þessari stöðu sem við erum. Það gekk líka erfiðlega að halda boltanum fram á við.

„Það breytir því ekki að við gáfum fá færi á okkur og það voru þessar tvær hornspyrnur sem skildu á milli,“ sagði Ásmundur.

Það vakti athygli að Tryggvi Guðmundsson sat á varamannabekknum allan leikinn, fyrir utan þann tíma sem hann hittaði upp. Ásmundur gaf lítið fyrir þær sögusagnir að þátttaka Tryggva sé takmörkuð vegna agaleysis utan vallar.

„Mér datt ýmislegt í hug og var með nokkra varamenn sem möguleika og ég gerði það sem ég taldi vera sterkast fyrir okkar leik.

„Ég get ekkert sagt nema ég geri það sem ég tel sterkast fyrir liðið og þá nálgun sem við höfum á leikinn. Hann eins og aðrir eru ekki þar eins og staðan er núna,“ sagði Ásmundur sem er ekki farinn að óttast stöðu sína þrátt fyrir aðeins tvö stig í átta fyrstu leikjunum.

„Sú umræða er mest hjá ykkur í fjölmiðlunum. Staðan uppi í Árbæ er sú að við ræðum vel saman og spáum í spilin og reynum að snúa þessu við. Hjá mér er ekkert annað í spilunum en að halda áfram og reyna að finna leið til að kreista fram stig.

„Það vantar lítið upp á til að hlutirnir falli með okkur. Við þurfum að kafa ofan í og finna hvar þetta litla er sem við þurfum til að klára leikina og tína inn stig. Það er auðvitað það sem þetta snýst um,“ sagði Ásmundur.