Jóhannes Gijsen látinn - var sakaður um hylmingu og kynferðisbrot

Jóhannes Gijsen, fyrrverandi biskup kaþólsku kirkjunnar hér á landi lést í dag, 80 ára að aldri, að því er fram kemur í hollenskum fjölmiðlum.

Gijsen var skipaður stjórnandi biskupsdæmisins í Reykjavík í maí 1996. Hann gegndi því embætti allt þar til Pétur Bürcher tók við í október 2007.

Gijsen var borinn þungum sökum um kynferðislega misnotkun í hollenskum miðlum í september árið 2010. Þá átti hann að hafa beitt börn í hollenskum skóla á sjötta og sjöunda áratug síðustu aldar kynferðislegu ofbeldi. Hann neitaði þessum ásökunum staðfastlega.

Rannsóknarnefnd, skipuð af kaþólsku kirkjunni, vék sérstaklega að hlut Jóhannesar í skýrslu sinni um ofbeldi sem Margét Muller, kennslukona í Landakotsskóla, og séra Ágúst Georg skólastjóri beittu nemendur sína.

Var þá sérstaklega vísað til þess að Jóhannes hafi eyðilagt bréf manns sem lýsti hryllilegri reynslu sinni í skólanum og þannig hylmt yfir með Ágústi og Margréti.

Þá kom einnig fram í skýrslunni að Jóhannes lagði sérstaklega til við páfagarð árið 1998 að séra Georgi væri veitt sérstök viðurkenning fyrir störf sín hjá skólanum.

Ári eftir að Jóhannes lét af störfum hér á landi framdi Margrét Muller sjálfsmorð.