Vilja að Illugi skýri málið

Stjórn Vöku, lýðræðissinnaðra stúdenta, hefur sent frá sér yfirlýsingu vegna fyrirætlana menntamálaráðherra um að draga úr fjárframlögum til LÍN. Hún fer þess á leit við nýskipaðan menntamálaráðherra, Illuga Gunnarsson, að hann varpi ljósi á málið.

„Við viljum helst fá menntamálaráðherra til að tjá sig um þetta opinberlega," segir Ísak Rúnarsson formaður Vöku í samtali við Vísi. „Það hafa engar eiginlegar tölur verið ræddar en það er útséð að þetta hefur mikil áhrif á studenta."

Í yfirlýsingunni kemur meðal annars fram að stjórn Vöku hafi skilning á bágri fjárhagsstöðu ríkissjóðs og átti sig á því að víða þurfi að skera niður. Ekki sé þó rétt að gera slíkt í menntamálum. „Það hlýtur þó að vera forgangsverkefni þjóðarinnar að fjárfesta í sjálfri sér enda hefur margsinnis sýnt sig að aukinn mannauður leiðir til aukinnar hagsældar,“ segir í yfirlýsingunni.

Yfirlýsinguna í heild sinni má finna hér.