Innlent

Félagsmálaráðherra ræðir við umboðsmann skuldara um kröfur Dróma

Ólöf Skaftadóttir skrifar
Í kjölfar lagabreytinga um vexti og verðtryggingu frá Alþingi þurftu lánastofnanir fyrir tæpum þremur árum að reikna öll íbúðalán sem bundin voru erlendum gjaldmiðlum upp á nýtt.

Ekki var gerður greinarmunur á gengistryggðum lánum eins og það var kallað eða lánum í erlendri mynt

Drómi reiknaði lánin út aftur í samræmi við lögin en setti þó þann fyrirvara á endurútreikninga að lánin kynnu að vera lögleg, enda taldi Drómi að lögin sem sett voru um vexti og verðtryggingu væru ekki samkvæmt stjórnarskrá.

Í maí sneri Hæstiréttur dæminu við og og dæmdi þessi tilteknu lánaform hjá SPRON, eða þann hluta þeirra sem var í erlendri mynt, lögleg.

Í kjölfar þess dóms fór Drómi fram á að ríkið bætti félaginu tjónið sem það taldi sig hafa orðið fyrir vegna endurútreikninganna.

Krafan hljóðaði upp á einn og hálfan milljarð króna.

Fyrir um tveimur mánuðum hafnaði fjármálaráðuneytið hins vegar kröfunni.

Drómi hefur þannig ákveðið að krefja lántakendur um mismuninn. Alls mega því um 160 lántakendur eiga von á reikningum frá Dróma á næstunni, og er heildarupphæð þeirra um einn og hálfur milljarður króna.

Eygló Harðardóttir, félagsmálaráðherra
Eygló Harðardóttir, félagsmálaráðherra, fékk fregnir af kröfum til lántakenda í gær og sagðist í útvarpsþættinum Í bítið á Bylgjunni í morgun ætla að ræða við umboðsmann skuldara um málið í dag.

Gísli Tryggvason, talsmaður neytenda
Gísli Tryggvason, talsmaður neytanda, sagði í samtali við hádegisfréttir Bylgjunnar að honum þætti rétt að ríkislögmaður tæki stöðu með lántakendum og reynt væri að hafa meðalgöngu í málinu.

Mest lesið


Fleiri fréttir

Sjá meira


×

Mest lesið