Dóttir kynferðisafbrotamanns: "Það er ekkert hægt að hjálpa svona mönnum“

„Ég beið bara eftir því að þetta endurtæki sig,“ segir dóttir Jóhanns Sigurðarsonar, sem hefur verið úrskurðaður í gæsluvarðhald fyrir að brjótast inn á tvö heimili og brotið kynferðislega gegn unglingsstúlku öðru heimilinu og svo konu á öðru heimili.

Sakarferill Jóhanns er orðinn nokkuð langur, en brotin eiga það nær öll sameiginlegt að hann brýst inn á heimilin og brýtur þar kynferðislega á börnum eða íbúum.

Dóttir Jóhanns hefur skipt um eftirnafn og lokað á öll samskipti við föður sinn. Hún kom fram í viðtali við DV árið 2008 en þá sagði hún föður sinn mann sem breyttist í ófreskju þegar hann drykki áfengi.

Dóttirin segir föður sinn hafa reynt að hafa samband við sig eftir að hann losnaði úr fangelsi árið 2011. Þá var hann á skilorði og mátti ekki drekka.

„Það rann svo út í apríl síðastliðnum,“ segir hún um skilorðið í samtali við Vísir. Það virðist því hafa tekið Jóhann um tvo mánuði að brjóta af sér á ný.

Jóhann var dæmdur í desember árið 2008 í fjögurra ára fangelsi yfir að brjótast inn á heimili og misnota stúlkubarn sem lá sofandi við hlið ömmu sinnar. Amman vaknaði skyndilega við manninn og stökk honum á flótta. Hann var handtekin skömmu síðar.

Fjórum árum áður var hann dæmdur fyrir að nema barn á brott á Seyðisfirði um miðja nótt. Faðir barnsins fann Jóhann úti á stétt fyrir utan heimilið - með barnið í fanginu. Jóhann var dæmdur í tveggja ára fangelsi fyrir það brot.

Nú, rúmlega fjórum árum eftir að hann var dæmdur síðast, er Jóhann kærður fyrir kynferðisbrot gegn að minnsta kosti einni konu og unglingsstúlku í Þingholtunum og Kópavogi. Aftur er hann kærður fyrir að brjótast inn á heimilin og brjóta þar á konunum.

Jóhann er fæddur árið 1968 og er járnsmiður að mennt. Dóttir Jóhanns segist ekki hafa vitað af meintum brotum föður síns fyrr en hún las um þau í Fréttablaðinu í morgun, en þar var hann nafngreindur.

„Það er ekkert hægt að hjálpa svona mönnum,“ segir dóttir hans, sem sjálf neitar alfarið að eiga í samskiptum við föður sinn í ljósi þess að hún á sjálf barn.

Jóhann breytti um nafn eftir að hann var látinn laus árið 2011. Núna heitir hann Jóhannes Páll Sigurðsson í þjóðskrá.