Ögmundur vill að þingið taki upp mál Snowden

Ögmundur Jónasson þingmaður Vinstri grænna og fyrrverandi innanríkisráðherra vill að Alþingi taki upp mál Edwards Snowden, uppljóstrarans sem lak því til fjölmiðla að bandarískar leyniþjónustur standi í stórfelldum persónunjósnum.

Snowden hefur lýst yfir vilja til að sækja um pólitískt hæli hér á landi og segir Ögmundur að Íslendingar eigi að vera opnir fyrir slíkri beiðni.

„Mér finnst sjálfsagt að Íslendingar séu opnir fyrir því að taka við þessum manni og veita honum húsaskjól, berist beiðni um slíkt."

Og Ögmundur beinir því til alsherjarnefndar Alþingis og utanríkismálanefndar að taka þetta mál til umræðu. „Þetta mál á heima í þinginu fremur en í ráðuneytum að mínum dómi,“ sagði Ögmundur á Alþingi í dag.