Sigurvegarinn með 874% ávöxtun í Ávöxtunarleiknum

Úrslit Ávöxtunarleiks Vísis og Keldunnar hafa verið kunngjörð en sigurvegari leiksins er Stefán Jónsson, viðskiptafræðingur í fjárstýringu Eimskipa. Honum tókst að ávaxta fé sitt um 874% sem er tæplega tvöfalt meira en næsti maður fyrir neðan.

Stefán hlýtur í verðlaun ferð til New York þar sem honum gefst kostur á að heimsækja NASDAQ MarketSite, sem og 200 þúsund krónur úr sjóðum VÍB. Í liðakeppni vann liðið 1. Veldið, sem samanstendur af Jónínu Olsen og Óla Þór Ásgeirssyni, en þau eru mæðgin. Sigurvegari fyrir aprílmánuð var Aðalheiður Ingadóttir og fyrir marsmánuð Ólafur Haukur Magnússon.

Helgi Þór Logason, framkvæmdastjóri Keldunnar, segist ánægður með keppnina: „Við óskum Stefáni og liðinu 1. Veldinu innilega til hamingju með sigurinn, sem og einnig öðrum hástökkvurum í Ávöxtunarleiknum. Við settum okkur það markmið að vekja áhuga landsmanna á heimi fjármála með fræðandi og jákvæðum hætti.  Við erum mjög ánægð með árangurinn af þessu verkefni, en tæplega 7000 manns tóku þátt í leiknum og 60 lið. Tæplega 234.000 viðskipti voru framkvæmd að heildarupphæð rúmlega 381.570 milljarða króna. Við þökkum öllum spilurum kærlega fyrir þátttökuna.”

Í tilkynningu Keldunnar kemur fram að af þeim fjárfestingarkostum sem stóðu til boða voru mest viðskipti með hlutabréf og þar helst með hlutabréf Icelandair Group, Haga og Marel. Af skulduabréfum voru mest viðskipti með skuldabréf Íbúðalánasjóðs (HFF150914) og evrur og dollarar voru þeir gjaldmiðlar sem mest viðskipti voru með.