Ragnhildur Steinunn: "Myndi ekki taka þátt í dag"

Yfir 1.000 umsóknir borist í Ungfrú Ísland sem er nú haldin aftur eftir árshlé. Ragnhildur Steinunn Jónsdóttir var kosin Ungfrú Ísland árið 2003. Hún myndi ekki taka þátt í dag og hvetur ungar stúlkur til að taka ekki þátt í slíkum keppnum.

Mikið vatn hefur runnið til sjávar síðan Ragnhildur var kjörin Ungfrú Ísland fyrir tíu árum síðan, en í dag er hún ein ástsælasta sjónvarpskona þjóðarinnar. Ragnhildur segir keppnina ekki hafa skapað nein sérstök tækifæri fyrir sig.

„Nei, ég myndi ekki taka þátt í þessari keppni í dag. Aðallega vegna þess að hún hefur frekar verið mér til trafala en hitt.“

Opnað var fyrir skráningu í Ungfrú Ísland í gær og viðbrögðin hafa ekki látið á sér standa. Fjölmargar umsóknir hafa borist frá konum af öllum stærðum gerðum og á öllum aldri. Það eru þó ekki alveg allir sem geta tekið þátt, en forsvarsmenn keppninnar lýstu því yfir í gær yfir að grundvallarskilyrðin fyrir þáttöku séu að stúlkurnar séu aldrinum 18 -24 ára, barnlausar og ógiftar.