"Fátt sumarlegra en folöldin“

Það var mikil gleði hjá Gísla Haraldsyni og fjölskyldu þegar lítið folald kom í heiminn í gær eftir næturvöku og dagvakt. Merin Hrauna frá Húsavík kastaði, en folaldið er undan Svaka frá Miðsitju.

Gísli er ánægður með kyn, en það fæddist bleikalóttur hestur. Gísli segir virkilega gaman að fylgjast með þessu ferli; köstuninni, hvernig folaldið reynir að komast á fætur og hvað það þurfti margar tilraunir til þess mikilvægasta – að komast á spena.

„Þetta er mikil uppáhalds meri hjá mér og ég beið lengi hjá henni til að geta myndað allt ferlið. Ég rétt svo skrapp í kaffi í gær og þegar ég kom til baka var hún farin af stað,“ segir Gísli sem er búin að bíða spenntur síðustu daga.

Gísli segir ekkert vera sumarlegra en folöldin, en þetta er þó það eina sem hann á von á í sumar.