Ríkisfjármál til umræðu og stjórnarskrárfrumvarp fyrir nefnd í dag

Að loknum óundirbúnum fyrirspurnum til ráðherra á Alþingi í dag fara fram sérstakar umræður um áherslur ríkisstjórnarinnar um ríkisfjármál.

Upphafsmaður umræðunnar er Steingrímur J. Sigfússon fyrrverandi atvinnuvegaráðherra og lengst af fjármálaráðherra í síðustu ríkisstjórn. Til andsvara verður Bjarni Benediktsson fjármálaráðherra, sem lýst hefur yfir að halli á fjárlögum þessa árs verði allt að 30 milljarðar króna eða mun meiri en fjárlög geri ráð fyrir.

Stjórnarskrárfrumvarp þingmanna Samfylkingarinnar og Vinstri grænna verður tekið fyrir á fundi stjórnskipunar - og eftirlitsnefndar klukkan níu, en það er sams konar frumvarp og lagt var fram á síðasta þingi.

Þá verður frumvarp ríkisstjórnarinnar um flýtimeðferð skuldamála fyrir dómstólum tekið fyrir á fundi allsherjar- og menntamálanefndar.