"Painting in my eyes" stolið af Nýlistasafninu

Listaverkinu „Painting in my eyes" var stolið af Nýlistasafninu þann 18. maí síðastliðinn. Verkið er eftir Loga Bjarnason listamann.

Verkið var til sýnis á safninu en að sögn Loga mun því hafa verið stolið þegar starfsmaður safnsins brá sér stuttlega frá. Logi beinir því eindregið til þess sem tók verkið að skila því, enda hafi það ekkert notagildi utan safnsins. Engir eftirmálar verða ef viðkomandi skilar verkinu á Nýlistasafnið.

„Það er búið að kæra þetta til lögreglunnar. Það verða samt engir eftirmálar ef hann skilar verkinu. Það sem skiptir mestu máli er að verkinu verði skilað því sýningin verður í gangi í allt sumar. Núna er bara lögregluskýrslan sem var tekin á safninu komin í staðin fyrir verkið."

Hefur ekkert notagildi fyrir þjófinn

Logi segir viðkomandi tæpast geta haft verkið til sýnis. „Það er erfitt fyrir einstakling að vera með verkið til sýnis því það er einstakt og þekkist þar sem til þess sést. Þetta er búið til sem málverk sem maður gengur með á andlitinu, svona hálfgert skraut," segir Logi og bætir við að lokum: „Þetta verður einhverskonar skúffuverk."