Fólk skilur til að fá hærri barnabætur

Það hefur færst mjög í aukana að hjón slíti samvistum frá hruni. Þannig eru 4.126 gift hjón á Íslandi í dag sem ekki eru skráð í samvist, en þau voru 3.334 árið 2008. Þetta sé vegna þess að lög geri ráð fyrir að sé fólk ekki með sama lögheimili verði það að slíta samvistum. Þetta kemur fram í Fréttablaðinu í dag.

Séra Vigfús Þór Árnason, sóknarprestur í Grafarvogskirkju, segir löggjöf í kringum hjónabönd ófullkomna.

Vigfús nefnir sem dæmi að vegna löggjafar sjá hjón sér gjarnan leik á borði og skilji að fá meiri pening greiddan úr sameiginlegum sjóðum, eins og til dæmis hærri barnabætur: „Það er örlítið hagkvæmara ennþá að fá barnabætur ef maður er ekki í hjónabandi. Þá hafa sumir skilið til að fá hærri bætur, búið saman og verið skráðir í sundur til að fá hærri bætur. Við höfum alltaf verið að reyna að benda stjórnvöldum á að það sé mikilvægt að það sé ekki síðra að vera í hjónabandi en að vera í sundur."

Vigfús telur ráð að breyta lögum svo að fólk grípi ekki til þess ráðs að skilja af fjárhagslegum ástæðum. Hann segir þó aðrar ástæður gjarnan vera fyrir hjónaskilnuðum: „Skilnaðir skapast oft út af erfiðleikum ytra og einn stór örðugleiki í lífinu eru fjárhagsörðugleikar." Því virðast peningamálin gjarnan vera valdur skilnaða.