Var að gæla við að setja upp kannabisræktun

Lögreglan á Suðurnesjum fann talsvert magn af fíkniefnum við leit í íbúðarhúsnæði í umdæminu í vikunni.

Húsleitin var gerð að fengnum úrskurði héraðsdóms Reykjaness. Karlmaður á fertugsaldri, sem aðsetur hefur í á neðri hæð hússins var með amfetamín í vasanum.

Þá fundu lögreglumenn krukku með amfetamíni í ísskáp og meira af efninu í kommóðuskúffu. Loks fannst plastpoki með meintum MDMA-kristöllum.

Annar íbúi í húsinu var með talsvert magn af kannabisfræjum í fórum sínum, þegar leitað var hjá honum. Hann tjáði lögreglumönnum að hann hefði verið að gæla við þá hugmynd að setja upp kannabisræktun, en væri hættur við það núna.