Laxeldi hætt og bleikjan á land

Forsvarsmenn fiskeldisfyrirtækisins Rifós hf. í Kelduhverfi hafa ákveðið að leggja af sjóeldi á bleikju og hefja uppbyggingu á bleikjueldi í landi. Fyrirtækið hefur ákveðið að hætta laxeldi í sjókvíum með öllu.

Með þessari stefnubreytingu verður fyrirtækið stækkað en allt eldi fyrirtækisins hefur verið í sjókvíum hingað til. „Við höfum einnig ákveðið að hætta laxeldi og snúa okkur alfarið að bleikjueldi til útflutnings á Ameríkumarkað,“ segir Hlífar Karlsson, framkvæmdastjóri Rifóss.

Fyrirtækið hefur starfsleyfi til þúsund tonna eldis á bleikju að uppfylltum ákveðnum skilyrðum. Hlífar segir að stefnt sé að því að 20% eldisins fari fram á landi til að byrja með en ef vel tekst til getur hlutfallið orðið allt að 40%.

„Þetta helgast af því að við höfum yfir að ráða 10 gráðu heitu vatni frá náttúrulegum uppsprettum og búum þá við kjörhita allt árið til eldisins á landi, en í sjó er mikil hitasveifla og vaxtartíminn einungis 6-7 mánuðir. Hér er því um mjög gjaldeyrisskapandi uppbyggingu að ræða,“ segir Hlífar.