Rak logandi sígarettu í trýnið á Nökkva

Ölvaður maður um þrítugt veittist að fíkniefnaleitarhundinum Nökkva og rak logandi glóð í trýnið á honum við félagsheimilið á Patreksfirði aðfaranótt sunnudags.

Nökkva var mjög brugðið við árásina og var óstarfhæfur um stund. Að sögn lögreglunnar á Patreksfirði hafði Nökkvi fundið eitthvað af fíkniefnum fyrr um kvöldið.

Maðurinn var handtekinn og færður í fangaklefa og hefur hann verið yfirheyrður. Málið er litið mjög alvarlegum augum en maðurinn gæti verið kærður fyrir brot á dýraverndunarlögum, almennum hegningarlögum og lögreglulögum.

Að sögn lögreglunnar á Patreksfirði hlaut Nökkvi ekki skaða af.

Nökkvi er með bestu fíkniefnahundum landsins en hann kom sá og sigraði á Íslandsmóti fíkniefnahunda í fyrra ásamt hundinum Buster.