Rannsóknarlögreglumaður segir aðgerðir gegn klámi á skráardeilisíðum flókið mál

Dæmi eru um að börn noti klámmyndir sem þau finna á netinu sem gjaldmiðil á skráardeilisíður líkt og deildu.net. Forsenda þess að fá niðurhal á síðunni er að setja inn vinsælt efni á móti. Því hafa notendur margir brugðið á það ráð að hala inn klámi. Meðal annars börn.

Samkvæmt 210. Grein almennra hegningarlaga er öll dreifing á klámi bönnuð og lögin því brotin í hvert skipti sem slík skráarskipti eiga sér stað.

Hefðbundnar netsíur ná ekki yfir starfsemi  skráardeilisíðna og börnin því óvarin gagnvart klámefni sem þar er inni. Þórir Ingvarsson rannsóknarlögreglumaður sérhæfir sig í netöryggi barna. Hann segir vandann erfiðan við að etja en ábyrgðin liggi þó fyrst og fremst hjá foreldrum sem verði að uppfræða börn sín um ábyrga netnotkun.