Bó vill jarðsyngja Hemma í beinni

Björgvin Halldórsson söngvari gerir það að tillögu sinni að útför Hermanns Gunnarssonar - Hemma Gunn - verði í beinni útsendingu og fari fram frá Valsvellinum.

"Það eru örugglega margir sem vilja fylgja honum. Við vorum að tala um það vinirnir í morgun, og mér fyndist vera við hæfi, þó ég sé ekki að plana neitt, að svo þjóðin fái að votta honum virðingu sína verði jarðarförin í beinni útsendingu og á Valsvellinum, þar sem hann átti heima, Vodafone-höllinni, svo allir geti tekið höndum saman og vottað þessum góða dreng virðingu sína."

Björgvin nefndi þennan möguleika í Íslandi í dag, í gær, þar sem fjallað var ítarlega um Hemma Gunn og rætt var við fjölda vina hans. Hemmi varð bráðkvaddur á Tælandi á þriðjudag og má segja að í gær hafi ríkt þjóðarsorg á Íslandi. Sennilega komast færri nær því að mega segja ástmögur þjóðarinnar en Hemma Gunn.

Tillaga Björgvins er ekki úr lausu lofti gripin; Hemma var margt til lista lagt en frægastur var hann líklega fyrir sjónvarpsþætti sína, Á tali hjá Hemma Gunn, sem voru einmitt alltaf í beinni útsendingu, var beinlínis lagt uppúr því. Og svo vinamargur var Hemmi að þegar hann var fimmtugur bauð hann allri þjóðinni til afmælisveislu á skemmtistaðnum Hótel Íslandi.

Freyr Einarsson, sjónvarpsstjóri Stöðvar 2, tekur þessari hugmynd vel: "Ef nánustu aðstandendur Hemma telja þetta ráð þá erum við á Stöð 2 meira en opin fyrir því að sýna frá jarðarförinni; í beinni útsendingu í opinni dagskrá."