Undirskrift Sigmundar bendir til bjartsýni, hagsýni og stjórnsemi

„Það er enginn starfandi rithandarsérfræðingur á Íslandi í dag,“ segir skrautskriftarkennarinn Jens Guðmundsson í samtali við Vísi, en hann féllst á það að rýna í undirskrift Sigmundar Davíðs Gunnlaugssonar, verðandi forsætisráðherra, í dagbókina á Bessastöðum.

Sigmundur mætti þangað í morgun til þess að eiga fund með forsetanum, en blekpenninn snerist gegn Sigmundi þegar hann ritaði í bókina og skildi eftir sig blekklessu á blaðsíðunni.

„Það eru skiptar skoðanir á því hvað megi lesa mikið úr skrift fólks, og sérstaklega úr undirskrift. Dæmi eru um að fólk skrifi nafnið sitt allt öðruvísi en annan texta,“ en Jens segir rithandarsérfræðinga erlendis oftast byggja rannsóknir sínar á lengri bréfum.

„Ég hef lesið mér mikið til um þetta og það verður auðvitað að taka þessu öllu með fyrirvara,“ segir Jens, en hann segist hafa mikla ástríðu fyrir öllu sem tengist skrift, og hafði þetta um undirskrift Sigmundar að segja:

„Skrift sem hallar til hægri og er opin, það er að segja að stafirnir liggja ekki þétt saman, bendir til þess að sá sem skrifar sé félagslyndur og sæki í að vinna með öðrum. Skrift Sigmundar jaðrar við að halla til hægri og vera opin. Ekki afgerandi en hneigist í það far. Hún hallar það lítið að hún bendir til hagsýni og raunsæi.“

Jens segir mjög smáa stafi sýna einbeitingarhæfileika en þeir séu jafnframt algengt sérkenni á rithönd feiminnar manneskju.

„Hornhvassar brúnir gefa til kynna stjórnsemi. Óvenju stór og opin G, L og D eru ávísun á afslappaðan mann sem á auðvelt með að tjá hug sinn og er til í að skoða nýjar hugmyndir. Stærð upphafsstafa ræðst að nokkru af sjálfsáliti. Því stærri sem upphafsstafir eru þeim mun meira er sjálfsálitið.“

Þá segir Jens það benda til mikillar bjartsýni hvað punktar og kommur eru fjarri stöfunum í undirskrift Sigmundar.

„Nafnið Davíð er ofar á blaðsíðunni en nafnið Sigmundur, og Gunnlaugsson er ofar en nafnið Davíð. Þetta einkennir bjartsýna og hamingjusama.“