Ömurlegt að heyra stjórnarandstæðinga óska fráfarandi stjórn alls ills

„Á tíma síðustu ríkisstjórnar fannst mér ömurlegt að heyra stjórnarandstæðinga óska stjórninni alls ills, og þeir hinir sömu gátu ekki einu sinni glaðst þegar góðar fréttir bárust af ríkisfjármálum, minnkandi atvinnuleysi eða góðri afkomu fyrirtækja. Heiftin í garð pólitískra andstæðinga var sterkara afl en óskin um bættan hag landsmanna," segir Gísli Marteinn Baldursson, borgarfulltrúi Sjálfstæðisflokksins á bloggsíðu sinni í dag.

Gísli Marteinn skrifar pistilinn Ríkisstjórnin er dauð, lengi lifi ríkisstjórnin! í tilefni af því að ný ríkisstjórn Sjálfstæðisflokksins og Framsóknarflokksins tekur formlega við völdum í dag.

„Það sem mér finnst best við nýju ríkisstjórnina er að ráðherrarnir eru allir nýir. Kynslóðin sem nú er smám saman að sópast út af sviðinu var orðin svo vígamóð, heiftúðug og langrækin að það stóð endurreisn Íslands fyrir þrifum," segir Gísli Marteinn og heldur áfram. „Þetta var áberandi í síðustu ríkisstjórn, þar sem ungu ráðherrarnir voru hættir að fela óþol sitt gagnvart þeim gamla stíl."

Hann segist vonast til þess að ríkisstjórnin sem taki við völdum í dag sýni hógværð gagnvart valdinu sem hún fær og kappkosti við að minnka það með því að leyfa fólki sem mest að ráða sér sjálft.

„Stjórnin þarf að bera virðingu fyrir því að tæpur helmingur þjóðarinnar kaus aðra flokka og að það er ekki bara hægt heldur nauðsynlegt að ná sátt um stóru málin. “

Bloggsíða Gísla Marteins.