Bannað að gefa öndunum brauð í sumar

Andarungum fjölgar hratt á þessum árstíma og sjást nú á ferð og flugi með foreldrum sínum á Tjörninni. Reykjavíkurborg vill brýna fyrir fólki að gefa öndunum ekki brauð yfir sumartímann, þar sem það eykur stórlega líkur á að hættulegir vargfuglar á borð við sílamáva geri vart við sig og vinni ungunum mein.

Fram kemur á vef Reykjavíkurborgar að fækkun máva sé mikilvægur þáttur í að bæta afkomu andarunga. Sílamávarnir eru sólgnir í brauðið, en því miður er algengt er að þeir geri andarungunum mikinn skaða þegar þeir eru í brauðleiðöngrum við Tjörnina. Því er mjög mikilvægt að reyna að halda mávunum í skefjum á þessum tíma.

Mikilvægast er að gefa öndunum ekki brauð eða annan skyndibita í júní og júlí. Yfir sumartímann er meira af náttúrulegu æti í Tjörninni fyrir bæði endur og svani og þörfin fyrir brauðið því minni.

Mávurinn leitar líka í matarleifar í opnum ruslatunnum og því er fólk einnig hvatt til að ganga vel um í kringum Tjörnina.