Mannbjörg þegar eldur kom upp í fiskibáti

Mannbjörg varð upp úr hádegi þegar eldur kom upp í 8 metra löngum fiskibát um 4 sjómílur suðaustur af Arnarstapa.

Einn skipverji var um borð og var honum bjargað um borð í nærliggjandi fiskibát, samkvæmt tilkynningu frá Slysavarnarfélaginu Landsbjörg. Björg, björgunarskip Slysavarnarfélagsins Landsbjargar á Rifi var einnig kallað út og er það á leið á staðinn og aðstoðar ef þörf verður á.

Þyrla Landhelgisgæslunnar var send ásamt slökkviliðsmönnum frá Slökkviliði höfuðborgarsvæðisins á vettvang en fiskibáturinn logar stafna á milli og talið er að hann muni sökkva.

Áætlað er að þyrlan flytji  skipverjann til Reykjavíkur til læknisskoðunar á spítala en hann brenndist ekki en er hugsanlega með snert af reykeitrun.