Segir RÚV ekki gæta jafnræðis

„Það eru ansi mörg og sannfærandi dæmi um að það sé slagsíða á efnistökum RÚV og það er áhyggjuefni upp á það að umræðan í samfélaginu sé upplýst og vönduð," segir Ásgeir Ingvarsson í samtali við fréttastofu Vísis. „Á RÚV hvílir lögum samkvæmt skylda til að gæta jafnvægis í umfjöllun."

Ásgeir er meistaranemi í samanburðarstjórnmálum við London School of Economics og stjórnarmaður hjá Ludwig von Mises stofnuninni á Íslandi. Hann stendur fyrir undirskriftasöfnun á netinu þar sem skorað er á RÚV að sýna fræðsluþættina Free to Choose eftir nóbelsverðlaunahagfræðinginn Milton Friedman. Hátt í 100 manns hafa skrifað undir þegar þetta er ritað en undirskriftasöfnunin hófst á þriðjudag.

Mikilvægt að öll sjónarmið fái umræðu

Fræðsluþættirnir Free to Choose er tíu þátta röð frá 1980 og  var m.a. Monty Python leikarinn John Cleese einn framleiðenda þáttanna. „Ég vil meina að þættirnir eigi brýnt erindi við fólkið í landinu. Þar rekur Friedman á mjög öfgalausan og aðgengilegan hátt ákveðin grunnatriði í hagfræði og samfélagssýn frjálshyggjunnar. Þessir klassísku þættir ollu straumhvörfum á sínum tíma," segir Ásgeir og bendir á að einnig sé til styttri, 5 þátta endurútgáfa Free to Choose frá 1990.

„Þegar kemur að efni sem fræðir fólk um frjálshyggju er fátt sem slær þáttunum við," segir Ásgeir. „Það sem við erum að gera er að safna undirskriftum og svo ætlum við að senda stöðinni bréf, en áhugamenn um frjálshyggu hafa þegar boðist til þess að borga fyrir sýningarréttinn."

Ásgeir segir aðdraganda undirskriftasöfnunarinnar hafa verið þann að hann hafi sent RÚV erindi í þeirri von að þættirnir yrðu sýndir í tengslum við 100 ára fæðingarafmæli Friedmans árið 2012, en ekki átt erindi sem erfiði.

„RÚV hafði þá fyrir stuttu sýnt þáttinn Shock Doctrine þar sem m.a. var vegið að þeim skoðunum sem Friedman mælir fyrir. Shock Doctrine var sýnd og vinstrisinnaðir álitsgjafar héldu ekki vatni yfir þættinum. Þeir töldu að þar með hefði frjálshyggjan verið kveðin í kútinn. Fannst mér þá alveg kjörið að RÚV myndi gæta sanngirni og sýna þættina hans Friedmans á 100 ára afmæli þessa merkilegasta hagfræðings seinni hluta síðustu aldar."

Segir frjálshyggjuna hafða fyrir rangri sök

Ásgeir segir um stöðu frjálshyggjunnar í dag: „Það gætir ákveðins misskilnings um það hvað frjálshyggja er og hvað frjálshyggja er ekki. Ákveðnir flokkar hafa eignað sér frjálshyggjuna án þess að hafa endilega stundað hana. Það er alveg rétt að margt í efnahagslífinu og pólitíkinni færðist í átt að aukinni frjálshyggju seinustu áratugina, en þar með er ekki hægt að segja alvöru frálshyggja hafi ráðið för. Þvert á móti. ef maður skoðar málin í þaula og rekur sig að rótum alls þess versta sem riðið hefur yfir okkur og heimsbyggðina undanfarin ár þá reynist orsökin einmitt vera skortur á frjálshyggju og offramboð á ríkisafskiptum."