Rændi 10 ára stelpu í Vesturbænum og beitti kynferðisofbeldi

Karl á fertugsaldri var í dag í Héraðsdómi Reykjavíkur úrskurðaður í gæsluvarðhald til 29. maí að kröfu lögreglunnar á höfuðborgarsvæðinu, en það var gert á grundvelli rannsóknarhagsmuna. Maðurinn var handtekinn í gær, en hann er talinn hafa brotið kynferðislega gegn stúlku á ellefta ári.

Lögreglu barst tilkynning um málið skömmu fyrir klukkan 17 í gær þegar foreldrar stúlkunnar höfðu samband. Stúlkan var þá nýkomin til síns heima í Vesturbæ Reykjavíkur. Málsatvik voru þau að stúlkan var á heimleið úr skóla á þriðja tímanum eftir hádegi þegar ókunnugur maður tók hana með valdi og setti í aftursæti bifreiðar sem hann var á. Ekið var með stúlkuna á afvikinn stað í útjaðri höfuðborgarsvæðisins. Þar er maðurinn talinn hafa brotið gegn stúlkunni. Að því loknu ók maðurinn með stúlkuna aftur í Vesturbæ Reykjavíkur og hleypti henni þar út, en þó fjarri heimili hennar. Þaðan gekk hún til síns heima. Á meðan frelsissviptingin stóð yfir hafði maðurinn í frammi grófar hótanir við stúlkuna.

Gat gefið greinargóða lýsingu á manninum

Lögreglan fór á heimili stúlkunnar um leið og tilkynningin barst, en í framhaldinu var hún flutt til skoðunar á sjúkrahús. Fulltrúi barnaverndaryfirvalda var kallaður til, en þá þegar var hafin umfangsmikil leit að brotamanninum og ökutæki hans. Bíllinn fannst nokkru síðar við heimili mannsins í Austurborginni, en maðurinn var innandyra í húsinu. Hann var handtekinn og fluttur á lögreglustöð. Handtöku mannsins má þakka stúlkunni sjálfri, en þrátt fyrir hræðilega lífsreynslu, gat hún gefið greinargóða lýsingu á manninum, bílnum sem hann var á og leiðinni sem hann ók. Maðurinn hefur áður komið við sögu hjá lögreglu, en þó ekki vegna mála af þessum toga.

Í ljósi alvarleika málsins tekur lögreglan skýrt fram að slík mál eru afar fátíð. Lögreglan segir mikilvægt að foreldrar ræði yfirvegað við börn sín um þessi mál og kenni þeim hvernig bregðast á við ef þau lenda í slíkum aðstæðum.