Framsóknar- og sjálfstæðismenn hagnast á óförum Þorvaldar Gylfasonar

Allt bendir til þess að Lýðræðisvaktin verði af tæpum 30 milljónum í þingstyrk, samkvæmt lögum um fjármál stjórnmálaflokkanna.

Þetta hefur meðal annars það í för með sér að Sjálfstæðisflokkurinn og Framsóknarflokkurinn fá um 18 milljónir aukalega í styrki vegna þessa 0,04 prósenta munar. Lýðræðisvaktin hlaut í síðustu kosningum 2,46 prósent atkvæða samkvæmt tölum frá kjörstjórn en þurfti, samkvæmt lögunum, að ná 2,5 prósentum til að hljóta styrkinn.

Í lögum er þetta skýrt, en í II kafla, 3. grein segir: "Árlega skal úthluta fé úr ríkissjóði til starfsemi stjórnmálasamtaka sem fengið hafa a.m.k. einn mann kjörinn á Alþingi eða hlotið hafa a.m.k. 2,5% atkvæða í næstliðnum alþingiskosningum samkvæmt ákvörðun á fjárlögum hverju sinni. Fjárhæðinni skal úthlutað í hlutfalli við atkvæðamagn."