Ríkisstjórnarsamstarf kynnt á morgun eða þriðjudag

Ríkisstjórnarsamstarf Sjálfstæðisflokks og Framsóknarflokks verður kynnt á morgun laugardag eða á þriðjudag, samkvæmt heimildum fréttastofunnar.

Stjórnarmyndunarviðræður Bjarna Benediktssonar, formanns Sjálfstæðisflokksins og Sigmundar Davíðs Gunnlaugssonar, formanns Framsóknarflokksins eru nú á lokametrunum. Er stefnt að því að ljúka viðræðunum í dag eða á morgun.

Samkvæmt heimildum fréttastofunnar er stefnt að því að kynna ríkisstjórnarsamstarfið á morgun, laugardag, eða á þriðjudaginn, vegna Hvítasunnuhelgarinnar. Er fremur horft til þriðjudagsins í þessum efnum. Flokksráð Sjálfstæðisflokksins þarf að samþykkja ríkisstjórnarsamstarf við Framsóknarflokkinn. Þá þarf miðstjórn Framsóknarflokksins að gera slíkt hið sama.

Eftir að þessar stofnanir innan flokkanna hafa samþykkt samstarfið munu formenn flokkanna ákveða skiptingu ráðuneyta og í kjölfarið funda með einstökum þingmönnum. Síðan gera formennirnir tillögur um ráðherraefni sem bornar verða undir þingflokkana til samþykktar.

Stefnt er að því að fjölga ráðherrum um tvo. Formaður Sjálfstæðisflokksins hefur þegar lýst yfir áhuga á því að sérstakur heilbrigðisráðherra taki við heilbrigðismálum úr velferðarráðuneytinu. Þá verður atvinnuvegaráðuneytinu skipt upp í tvö ráðuneyti sem flokkarnir skipta með sér, eftir því sem fréttastofa kemst næst.

Þeir þingmenn sem fréttastofa hefur rætt við úr báðum flokkum ganga út frá því að Sigmundur Davíð Gunnlaugsson verði forsætisráðherra, en það þykir jafnframt eðlilegt þar sem hann hefur stjórnarmyndunarumboðið. Fréttatíminn fullyrðir í dag að Sigmundur Davíð verði forsætisráðherra og Bjarni Benediktsson verði fjármálaráðherra. Það hefur þó ekki fengist staðfest.

Forgangsverkefni nýrrar ríkisstjórnar eru annars vegar skuldamál heimilanna og hins vegar fjármagnshöftin. Lausnir þessara tveggja mála haldast í raun í hendur að vissu leyti, eins og formaður Framsóknarflokksins talaði um í aðdraganda kosninganna. Þá hafa þeir þingmenn sem fréttastofa hefur rætt við talað um skattalækkanir, en svigrúm til þeirra er takmarkað vegna viðkvæmrar stöðu ríkissjóðs. Hefur einkum verið horft til lækkunar tryggingargjalds fyrirtækja í þessum efnum.