Vill vera vinur Eiðs

Útvarpsmaðurinn Andri Freyr Viðarsson hefur fengið Sólmund Hólm til að hlaupa í skarðið fyrir Gunnu Dís Emilsdóttur í þættinum Virkir morgnar á Rás 2, en Gunna Dís er í fríi.

Hafa þeir Sólmundur meðal annars bryddað upp á þeirri nýjung að syngja upplýsingar um færð á vegum. Hefur uppátækið vakið kátínu margra, en ekki allra.

„Þetta mælist frekar betur fyrir en ekki,“ segir Andri í samtali við Vísi. „Fólk hefur gaman að þessu en auðvitað er einn og einn sem sem hefur það ekki. Þess vegna lesum við fyrst venjulega og endurtökum síðan í söng. Þannig að fólk fer ekki á mis við neinar upplýsingar.“

Einn þeirra lítt hrifnu er Eiður Svanberg Guðnason, fyrrverandi alþingismaður og málfarsbloggari. Segir hann í bloggfærslu sinni um sönginn: „Það er ekki ofsögum sagt af fíflaganginum sem dagskrárstjórar láta viðgangast í þessum þætti Rásar tvö. Ríkisútvarpið finnur sífellt nýjar leiðir til að sinna öryggishlutverki sínu!“

Þetta er alls ekki í fyrsta skipti sem Eiður gagnrýnir útvarps- og sjónvarpsmennsku Andra, og finna má fjölmargar bloggfærslur um þennan vinsæla fjölmiðlamann á Molabloggi Eiðs. Það er því eðlilegt að spyrja Andra hvort hann sé farinn að taka skrifin inn á sig.

„Nei í rauninni ekki. Sumir segja að ef hann fílar það ekki þá er maður að gera gott. Svo ég vitni í skrif hans Bjarna,“ segir Andri, en fréttamaður Vísis segist ekki vita um hvaða Bjarna er rætt.

„Nei ég segi svona. Hann er alltaf að vitna í einhverja gæja sem ég veit ekki einu sinni hvort þeir séu til. En ekki veit ég allt, í rauninni fæst. Ég ber engan kala til hans. Menn hafa mismunandi skoðanir. Það er ekki hægt að ætlast til þess að allir hafi gaman af þessari vitleysu.“

Sambandið slitnaði

Andri segist aldrei hafa hitt Eið, en þó hafi hann gert heiðarlega tilraun til að hafa samband við hann.

„Ég hringdi einu sinni í hann og ætlaði að bjóða honum í þáttinn en einhverra hluta vegna slitnaði sambandið. Boðið stendur ennþá og ég vil ekkert meira en vera vinur hans og fá hann annað slagið til okkar í þáttinn til að leiðrétta okkur á meðan við erum að fara rangt með staðreyndir og mál. Eiður er einn af þessum náungum sem ég held að sé gaman að grilla með.“

Andri segir föður sinn sérstakan aðdáanda bloggsíðu Eiðs.

„Hann hefur rosalega gaman af þessu. Það er varla að pabbi hringi í mig án þess að segja mér frá því nýjasta sem Eiður var að skrifa.“

En tekur Andri mark á aðfinnslum Eiðs?

„Já já. Ábendingar um málvillur reynir maður að taka til sín. En stundum fer það inn um annað og út um hitt. Hann skrifar svo mikið um mig að það er ógjörningur að komast yfir það allt. Ég bar það einu sinni undir Dr. Gunna hvort að það væri ekki gott samansafn í bók og hann tók undir það.“