Innlent

Kanye West keypti umdeilda regnhlíf af Sruli

Sruli Recht.
Sruli Recht.
Rúmlega ein milljón manns eru búnir að fara inn á heimasíðu hönnuðarins Sruli Recht síðasta sólahringinn, auk þess sem tónlistarstjarnan Kanye West keypti umdeilda regnhlíf af Sruli.

Það var mynd af hákarlahönskum sem vöktu athygli notenda vefsins reddit.com, sem sumir kannast við eftir að Jón Gnarr fór í viðtal á vefnum fyrir nokkru.

„Þetta eru hanskar úr hárkarlaskinni sem snýr inn. Þú getur eiginlega ekki farið úr þeim eftir að hafa klætt þig í þá,“ útskýrir Eva Brá Barkardóttir, verslunarstjóri Sruli Recht Store sem er í miðbæ Reykjavíkur.

Aðspurð hvað hún eigi við með að viðkomandi geti ekki klætt sig aftur úr hönskunum, útskýrir hún að efnið sé þess eðlis að það er ómögulegt að klæða sig  úr hanskanum nema með tilheyrandi sársauka og eyðileggja hanskann að auki. „Það kallar á mjög mikla skuldbindingu að fara í hanskann,“ segir Eva Brá og útskýrir kankvís að hanskarnir séu kannski frekar hugsaðir sem listaverk.

Áhuginn á hönskunum, og athyglin sem þeir fengu, varð til þess að Kanye West hafði samband við búðina og vill kaupa umdeildu regnhlífina The umbuster. Sruli var ákærður fyrir brot á vopnalögum þegar hann flutti járnin til landsins á sínum tíma, enda haldfangið hnúajárn. Ákæran var þó felld niður að lokum.

West er ekki fyrsta stjarnan sem kaupir föt af þessum hugmyndaríka hönnuði sem er frá Ástralíu, en þeir Karl Lagerfeld fatahönnuður og rokkstjarnan Lenny Kravitz keyptu jakka af honum fyrir nokkru.

Eva Brá segist ekki vita hver setti myndina inn á reddit.com, en viðbrögðin hafa verið gríðarleg. „Það er fullt af fólki að senda okkur pósta og spyrja okkur bæði um land og þjóð,“ segir hún. Fyrir áhugasama þá er verslunin á Bergstaðastræti 4 auk þess sem útsala er í gangi.




Fleiri fréttir

Sjá meira


×