Fuglaflensufaraldur: "Við þurfum að fara vel yfir allan viðbúnað"

Fuglaflensufaraldur í Kína hefur kostað tuttugu og tvö mannslíf. Yfirvöld á Taívan hafa staðfest að flensan hafi greinst í manni þar. Óvissustigi hefur verið lýst yfir hér á landi vegna þessa en sóttvarnalæknir segir þennan nýja stofn sérstaklega varhugaverðan.

Alþjóðaheilbrigðismálastofnun lýsti því yfir í dag að hinn nýji stofn fuglaflensunnar, H7N9, sé sá hættulegasti sem stofnunin hefur tekist á við. Talið er að afbrigðið smitist greiðlega milli manna og dýra.

„Þetta var varhugavert vegna þess að dánartíðnin er há. Þeir sem smitast af þessum stofni veikjast illa. Svo er hann sérstaklega varhugaverður vegna þess að það er erfitt að átta sig á því hvaðan veiran er að koma," segir Haraldur Briem sóttvarnalæknir.

Þessi nýji stofn fuglaflensunnar er á marga vegu frábrugðinn þeim sem spratt upp árið 2005 og geisar í raun enn. Sú veira er kölluð H5N1 og vakti óhug víða um heim. Sá stofn og útbreiðsla hans kostaði 332 lífið.

Mun auðveldara var að stemma stigum við því afbrigði, enda veiktust fuglarnir og drápust. Þannig gátu vísindamenn rakið rót veirunnar og þróað bóluefni. Sú vinna er skammt á veg komin þegar litið er á nýja afbrigðið.

„Þetta sem er að gerast í Kína er erfiðara af því leitinu til að ómögulegt er að sjá hvaðan flensan er að koma."

Hún er því óútreiknanlegri en fyrr afbrigði?

„Já, það má segja það. En það rétt að ítreka það að hún er ekki að berast milli manna. Það er kostur í stöðunni."

Landlæknisembættið fylgist náið með þróun mála í Kína. Í samstarfi við Almannavarnadeild Ríkislögreglustjóra hefur embættið lýst yfir óvissustigi vegna flensunnar.

„Við þurfum að fara vel yfir allan viðbúnað og okkar viðbragðsáætlun við hugsanlegum heimsfaraldri inflúensu,“ segir hann.

„Ég vil ítreka það að Alþjóðaheilbrigðismálastofnun hefur ekki lagt til neinar ferðatakmarkanir og engar viðskiptahrindranir. Hins vegar höfum við ráðlagt fólki að gæta vel  að handþvotti og að forðast svokallaða vokmarkaði. Þar sem er verið að selja lifandi dýr til  slástrunar. Menn ættu að forðast það að snerta fiður og aðra parta af fuglum."