Valitor þarf að opna greiðslugáttir fyrir WikiLeaks

Hæstiréttur staðfesti í dag dóm Héraðsdóms Reykjavíkur um að Valitor þarf að opna greiðslugátt fyrir Datacell og WikiLeaks, ellegar greiða 800 þúsund krónur í dagsektir á hverjum degi.

Stærstu kortafyrirtæki heims, Visa og Mastercard, skipuðu þjónustuaðilum að loka á alla þjónustu fyrirtækja sem taka á móti greiðslu fyrir Wikileaks eftir að upplýsingasíðan lak þúsundum pósta úr sendirráðum Bandaríkjanna út um allan heim. Það er Datacell sem þjónustar WikiLeaks hér á landi og lokaði Valitor, umboðsmaður Visa á Íslandi, fyrir allar greiðslur.

DataCell og WikiLeaks stefndu Valitor vegna lokunarinnar og varð það niðurstaða Héraðsdóms Reykjaíkur að opna ætti fyrir greiðslugáttina. Valitor áfrýjaði og komst Hæstiréttur að sömu niðurstöðu.