Tveimur háhyrningum bjargað í Heiðarhöfn - fjórir munu drepast

Fjórir háhyrningar eru enn í fjörunni í Heiðarhöfn á Langanesi samkvæmt Hilmu Steinarsdóttur, björgunarsveitarmanni og íbúa á svæðinu.

Hún hefur verið að fylgjast með aðgerðunum en sjálf sinnti hún ekki útkallinu. sex háhyrninga rak upp í fjöruna um klukkan tvö í dag og tókst að bjarga tveimur. Þá var þeim þriðja bjargað en sá synti rakleitt aftur upp í fjöruna og situr þar fastur.

„Ég held að þetta hafi aldrei gerst,“ segir Hilma í samtali við Vísi og bætir við að það sé enn sjaldgæfara að háhyrningar sjáist á þessum slóðum.

Sjö til átta menn úr björgunarsveitinni Hafliða voru í flotgöllum og reyndu að koma dýrunum aftur út í sjóinn. Þeir eru hættir störfum nú að sögn Siggeirs Stefánssonar formanns björgunarsveitarinnar, en sum dýrin eru ansi stór, og telja björgunarsveitarmennirnir að það sé fullreynt að koma þeim út í sjó. Það er því viðbúið að skepnurnar drepist í fjörunni.

„Ég man ekki eftir öðru eins,“ svarar Siggeir spurður hvort hann viti til þess að svona lagað hafi gerst áður. „Þetta er mjög sérstakt,“ bætir hann við að lokum.