Tékkneski verktakinn Metrostav ásamt Suðurverki áttu lægsta boð í Norðfjarðargöng, 9,3 milljarða króna. Þetta er stærsta verk sem Vegagerðin ræðst í eftir hrun og vonast vegamálastjóri til að hægt verði að komast í gegn fyrir lok árs 2016.

Gömlu Oddsskarðsgöngin þykja barn síns tíma, eru einbreið, liggja í 630 metra hæð yfir sjávarmáli og vegurinn að þeim beggja vegna þykir háskalegur, sérstaklega að vetrarlagi. Nýjum Norðfjarðargöngum, milli Eskifjarðar og Neskaupstaðar, er ætlað að koma í staðinn en þau verða sjö og hálfur kílómetri að lengd.

Þetta er langstærsta verk á vegaáætlun frá hruni og því ríkti eftirvænting í höfuðstöðvum Vegagerðarinnar þegar tilboð voru opnuð. Kostnaðaráætlun hljóðaði upp á rúma 9,5 milljarða króna en lægsta boð reyndist vera frá Metrostav og Suðurverki, upp á tæpa 9,3 milljarða, eða 97 prósent af kostnaðaráætlun. Hin tvö tilboðin reyndust bæði yfir kostnaðaráætlun.

Hreinn Haraldsson vegamálastjóri segir þetta viðsættanlegt, að fá eitt tilboð undir og tvö rétt yfir, og í takti við væntingar Vegagerðarinnar, þótt menn vonist alltaf til að fá heldur lægri tilboð.

Ráðamenn Fjarðabyggðar voru meðal þeirra sem óskuðu lægstbjóðandum til hamingju. Jón Björn Hákonarson, forseti bæjarstjórnar Fjarðabyggðar, segir að nú sé þessi löngu brýna framkvæmd að skella á.

„Þannig að við erum glaðir og kátir," segir Jón Björn.

Vegamálastjóri reiknar með að framkvæmdir hefjist í haust og að verkið taki þrjú til fjögur ár.

„Seint á árinu 2016, þá erum við að vonast til þess að það verði hægt að komast í gegn," segir Hreinn.

En óttast Austfirðingar að verkið verði skorið niður í haust, eins og iðulega gerist þegar ný ríkisstjórn sest að völdum?

„Við kyngjum því ekki. Og ég hef enga trú á öðru en að þetta haldi áfram. Þetta er komið á þann stað að framkvæmdir hefjist í haust," segir forseti bæjarstjórnar Fjarðabyggðar.