Fríríki inn í miðri borg?

Formaður borgarráðs Reykjavíkur undrast frumvarp forseta Alþingis þar sem lagt er til að ráðherra fái skipulagsvald á stóru svæði í miðborginni. Hann efast um að frumvarpið standist stjórnarskrá.

Ásta Ragnheiður Jóhannesdóttir, forseti Alþingis, lagði í gær fram frumvarp þar sem lagt er til að ráðherra fái yfirstjórn skipulags og mannvirkjamála á svæði í kringum austurvöll í miðborg Reykjavíkur. Samkvæmt heimildum fréttastofa hefur samstarf borgaryfirvalda og Alþingis um skipulagsmál á svæðinu verið afar stirt undanfarin misseri.

„Mér finnst það hafa komið svo vel fram á þessum fjórum árum, sem ég hef verið forseti þingsins, hvað það er mikilvægt að Alþingi komi að skipulagsmálum á þessu svæði, þar sem við erum með starfsstöðvar um allt þetta svæði Fólk þarf að fara þarna á milli og líka í ljósi þess að þingið hefur sérstöðu," segir Ásta Ragnheiður.

Þetta svæði nær frá Vonarstræti til Austurstrætis og frá Aðalstræti að Lækjargötu. Á svæðinu eru fjölmargir veitingastaðir og verslanir, Hótel Borg og Landsímahúsið svo fátt eitt sé nefnt.

Við Ingólfstorg er veitingastaðurinn Ali baba til húsa. Verði frumvarp forseta Alþingis samþykkt munu eigendur þessa húsnæðis framvegis þurfa að leita til ráðherra ef þeir ætla að gera breytingar á fasteigninni.

Formaður borgarráðs Reykjavíkur segir að með frumvarpinu sé verið að taka skipulagsvaldið frá borgaryfirvöldum.

„Við erum kannski fyrst og fremst undrandi á þessu. Sveitarfélög hafa auðvitað sjálfstjórn og sjálfstjórnarréttur er stjórnarskrárvarinn, þannig að við teljum að ýmsu að hyggja áður en Alþingi fer að samþykkja frumvarp af þessu tagi," segir Dagur B. Eggertsson.

Undir þetta tekur borgarfulltrúi sjálfstæðisflokks.

„Það er alveg skýrt að sjálfsákvörðunarréttur sveitarfélaga gildir um skipulagsmál innan þeirra landamarka, og allir sem hafa unnið í sveitarstjórnarmálum virða það," segir Gísli Marteinn Baldursson.

Hann segir sjálfsagt að borgin vinni með Alþingi þegar kemur að skipulagsmálum á svæðinu. Þetta sé hins vegar ekki rétta leiðin.

„Forseti Alþingis er að reyna að fá það mikil völd yfir öllum málum á þessu svæði, að það er nánast eins og hún hafi þann draum að þetta verði einhverskonar fríríki, eða mætti segja í gríni að hún sé að stofna Vatíkan Íslands þarna í miðri Reykjavík."