Lúðvík og Valgerður afgreiddu ekki frumvarp Árna Páls úr nefnd

Valgerður Bjarnadóttir vildi ekki tjá sig um það hvort hún væri sérstaklega óánægð með frumvarp eða vinnubrögð Árna Páls Árnasonar, formanns Samfylkingarinnar, sem ásamt formönnum Bjartrar framtíðar og Vinstri grænna lögðu fram frumvarp um stjórnarskrána sem lagt var fram á Alþingi fyrir um tíu dögum síðan.

Lúðvík segir í samtali við fréttastofu að hann hafi ekki viljað koma að þessari vinnu vegna þess að hann var þegar búinn að taka sambærilegt mál úr nefndinni og vísar þar í fyrstu tillögu stjórnlagaráðs.

Hvorki Valgerður né Lúðvík Geirsson tóku þátt í því að afgreiða frumvarpið úr stjórnskipunar- og eftirlitsnefnd fyrr í vikunni, en Valgerður er formaður nefndarinnar. Í stað þeirra voru varamenn kallaðir inn á fundinn en það eru Árni Páll Árnason og Magnús Orri Schram. Þá skrifuðu þær Sigríður Ingibjörg Ingadóttir og Oddný G. Harðardóttir þingflokksformaður undir nefndarálitið, en Oddný er ekki varamaður í nefndinni.

Aðspurð hversvegna Valgerður hafi ekki setið fundinn svarar hún því að hún hafi haft annað að gera og fengið leyfi til þess að sitja ekki fundinn.

Fréttastofa RÚV greindi frá því í hádeginu að mikil óánægja væri innan þingflokks Samfylkingarinnar vegna málsins. Meðal annars vegna þess að Árni Páll lagði fram frumvarpið án samráðs við Valgerði og Lúðvík. Frumvarpið snýst um að fresta hluta af tillögum stjórnlagaráðsins þar til á næsta kjörtímabili.

Einnig segir í frétt RÚV að þingmenn flokksins og flokksmenn finnist Árni Páll hafi ekki lagt mikla áherslu á samstöðu innan flokksins og í raun leikið mikinn einleik í málinu öllu.

Þá vilja viðmælendur fréttastofu RÚV meina að Árni Páll hafi gert mistök með því að hafa ekki verið búinn að tryggja betur stuðning formanna Sjálfstæðisflokksins og Framsóknarflokksins við málamiðlunartillöguna áður en lagt var upp í vegferðina.