Toyota greiði 93 milljónir

Hæstiréttur dæmdi á fimmtudag gegn Toyota, á þann veg, að félaginu hafi verið óheimilt að draga vexti af lánum frá rekstrartekjum við útreikning hagnaðar, og draga með því fjárhæðir frá skatti. Niðurstaðan, Toyota greiði 93 milljónir í ríkissjóð.

Málið má rekja til þess er Magnús Kristinsson, sem lengi hefur verið útgerðarmaður í Vestmannaeyjum, keypti Toyota í byrjun árs 2006.

Áhrifin af dómnum gæti víða gætt, en Skúli Eggert Þórðarson, ríkisskattstjóri, staðfesti við fréttastofu í dag að mörg sambærileg mál væru nú til skoðunar, en þau tengjast með einum eða öðrum hætti því sem oft er kallað öfugum skuldsettum samruna, en það er þegar dótturfélag kaupir móðurfélag sitt, og dótturfélagið geti greitt skuldir móðurfélagins með rekstrartekjum úr sjálfu sér.

Með þessu móti hafa tekjur verið dregnar frá skatti, en samkvæmt dómi Hæstaréttar, gæti það verið ólöglegt.

Skúli sagði við fréttastofu í dag, að skoða þyrfti hvert tilfelli fyrir sig, áður en fordæmi dómsins yrði metið, en við fyrstu sýn gæti hann haft víðtæk áhrif.

Sérstakar aðgerðir skattayfirvalda, þar á meðal endurálagning vegna samruna og yfirtöku á fyrirtækjum, hafa skilað miklum fjármunum í ríkissjóð á undanförnum þremur árum.

Í fyrra skiluðu þær 7,5 milljörðum, árið 2011 5,9 milljörðum og árið 2010 3,8 milljörðum króna.