Hnífjafnt í áfengiskönnun

Í könnun Fréttablaðsins og Stöðvar 2 sem gerð var í lok síðustu viku var spurt hvort fólk væri hlynnt eða andvígt því að heimild verði veitt til að selja áfengi í matvöruverslunum.

Ef litið er til allra landsmanna voru fjörutíu og fimm prósent mjög hlynnt eða frekar hlynnt hugmyndinni, níu prósent höfðu enga skoðun á málinu og fjörutíu og sex prósent andvíg.

Nokkur munur virðist vera á afstöðu fólks eftir því hvar það býr á landinu. Fjörtíu og átta prósent höfuðborgarbúa veru fylgjandi hugmyndinni en fjörutíu og sex prósent eru á móti.

Á landsbyggðinni eru menn hinsvegar heldur neikvæðari í garð málsins. 39 prósent þeirra segjast fylgjandi en meirihlutinn, eða 52 prósent segjast andvíg.

Ef litið er til aldurs kemur í ljós að yngra fólk er hrifnara af því að geta keypt sér áfengi í matvöruverslunum.

Fimmtíu og þrjú prósent fólks á aldrinum átján til 49 ára eru jákvæð en þrjátíu og sex prósent eru neikvæð. Í eldri hópnum, fimmtíu ára og eldri, er andstaðan hinsvegar mest. Þar eru fimmtíu og átta prósent á móti hugmyndinni en þrjátíu og sex prósent eru henni fylgjandi.