Matvælaskortur heimsins býður upp á sóknarfæri fyrir Íslendinga

Fyrirséður matvælaskortur í heiminum býður upp á sóknarfæri fyrir Íslendinga, segir þingmaður Framsóknarflokksins. Þingflokkur hans leggur á morgun fram þingsályktunartillögu um aukna matvælaframleiðslu á Íslandi.

Í greinargerð með tillögunni segir að jarðarbúum fjölgi um 200 þúsund á hverjum degi. Matvælaþörf heimsins verði 70 prósent meiri árið 2050 heldur en hún er í dag og sem dæmi megi nefna að árið 2025 muni vanta mjólk á kínverskan markað sem nemi heildarframleiðslu Frakklands, Rússlands og Bandaríkjanna.

Ásmundur Einar Daðason, þingmaður Framsóknarflokksins, segir að þeirra tillögur séu að menn fari að undirbúa það að auka matvælaframleiðslu hér á landi.

„Það er ljóst að á 21. öldinni þá verði eftirspurn eftir matvælum miklu meiri og við erum þegar byrjuð að sjá þetta," segir Ásmundur, og bendir jafnframt á aukinn áhuga á íslenskum matvælum bæði í Asíu, Evrópu og Bandaríkjunum.

„Við viljum að menn setjist niður og ræði það hvernig Ísland ætli að bregðast við og auka sína matvælaframleiðslu og nýta þessar auðlindir sem við eigum."