Ekki hægt að klára stjórnarskrármálið

Vinstri Grænir eru tilbúnir til viðræðna um að fresta heildarendurskoðun stjórnarskrárinnar gegn því að nokkrir kaflar verði afgreiddir á þessu kjörtímabili. Formaður flokksins segir mikilvægt að skapa sátt um framhald málsins á næsta kjörtímabili.

Árni Páll Árnason, formaður Samfylkingarinnar, telur að einsýnt að ekki verði hægt að klára stjórnarskrármálið í heild sinni á þessu kjörtímabili. Árni lýsti þessu yfir á laugardag en hann vill reyna skapa sátt um að klára einstaka hluta fyrir kosningar.

Katrín Jakobsdóttir, formaður Vinstri grænna, segist tilbúin til viðræðna um málið. „Helst hefðum við viljað ljúka því núna og ef þetta væri eðlilegt þing í eðlilegri lengd þá ætti það ekki að vera nein fyrirstaða fyrir því miðað við hversu langt málið er komið. en núna er eiginlega tímapunkturinn sá að þarf að setjast niður og kanna hver afstaða manna er til þess að klára einstaka hluta og ég er þegar búin að nefna ákveðna hluta og ég er þegar búin að nefna auðlindaákvæðið og beina lýðræðið og fleiri mál og mér finnst mjög mikilvægt að við notum tímann núna til þess að kanna hvaða samhljóm flokkarnir geta fundið í því," segir Katrín.

Mikilvægt sé að skapa sátt um framhald málsins á næsta kjörtímabili.

„Það liggur fyrir að stjórnarskráin verður ekki samþykkt - þó að hún verði samþykkt öll núna - þá þyrfti að samþykkja hana aftur á nýju þingi - það þarf að sjá fyrir endann á ferlinu. það skiptir máli að það sé sett einhver lína um það hvernig við ætlum að ljúka málinu á nýju þingi," segir Árni Páll.

Ekki er útilokað að Þór Saari, þingmaður Hreyfingarinnar, leggi fram vantrausttillögu á ríkisstjórna í dag en Hreyfingin vill klára málið í heild sinni á þessu kjörtímabili.

Þingmenn flokksins ætla að funda um málið eftir hádegi. Margrét Tryggvadóttir, þingmaður Hreyfingarinar, var gestur í þættinum í Bítið á Bylgjunni í morgun. „Ég mun ekki styðja það að þetta verði bútað niður. þetta er heildstætt plagg, í raun og veru, ef menn hafa ekki tíma. það krefst miklu meiri yfirlegu að fara að búta þetta niður. þetta er heild, þetta var hugsað sem heild og það er búið að vinna þetta allan tímann sem heild, og þetta bara áa ðvera heild," segir Margrét.