"Við höfum ekki lent í þessu áður"

„Við höfum ekki lent í þessu áður," segir Þorgrímur Óli Sigurðsson, aðstoðaryfirlögregluþjónn á Selfossi um 170 lítra af landa sem fundust grafnir í jörðu í Hrunamannahreppi á dögunum.

Eigandinn hefur viðurkennt að hafa falið landann í jörðu - en þetta er ekki í fyrsta skiptið sem hann er staðinn að landaframleiðslu.

Lögeglan á Selfossi fékk á dögunum ábendingu um að fundist hefði hola á svæðinu með töluverðu magni af landa. Þegar lögreglumenn koma á staðinn var búið að taka lokið af holunni.

Holan var um tveir metrar á lengd og einn metri á breidd og klædd að innan með krossviði og svo var tyrft yfir.

„Þetta var ekki sjáanlegt venjulegum mönnum," segir Þorgrímur Óli.

En er það algegnt að menn feli áfengi í jörðu?

„Ég hef þekki það nú ekki nema frá fjórða áratugnum þegar Björn Blöndal löggæslumaður var á ferð um sveitir. Þá gerðist það að menn voru að grafa upp tól og mjöð í jörðu, en við höfum ekki lent í þessu áður."

„Þetta voru um 170 lítrar sem fundust nú, sem er álíka mikið magn og var tekið af þessum sama manni fyrir um einum og hálfum mánuði síðan. Hann mun hafa verið að eiga við þetta á síðasta ári, þetta hefur hátt í 400 lítrar sem hann hefur verið búinn að framleiða."

Óheimilt er að framleiða áfengi á Íslandi sem er meira en 2,25 % að styrkleika.

Maðurinn hefur viðurkennt að hafa átt og framleitt landann.

„Það er þegar búið að gefa út ákæru vegna fyrra málinu, og það liggur fyrir að það verði gefin út ákæra vegna þessa máls. Hann hefur verið yfirheyrður og viðurkenndi að hafa átt þetta - hann hafi verið að safna þessu fyrir sjálfan sig," segir Þorgrímur Óli.