Ríkustu einstaklingar jarðar kynntir

Tímaritið Forbes hefur birt árlegan lista sinn yfir auðugustu einstaklinga veraldar. Sem fyrr er listinn með eindæmum áhugaverður enda eru upphæðirnar stjarnfræðilegar.

Samkvæmt Forbes er nú 1.426 milljarðamæringar á kreiki. Samanlögð auðævi þeirra eru 5.4 billjónir, það eru milljón milljónir (veldisvísir 10¹²) Bandaríkjadala. Þetta nemur rúmlega 673 billjörðum íslenskra króna (10¹⁵).

Tölur sem þessar eru undarlegar, nánast framandi. Það er því réttast að setja þær í samhengi.

Í stjarnfræðilegu samhengi er billjarður risavaxin tala. Ef við ímyndum okkur billjarð stjarna, s.b. sólin okkar, þá þyrfti á bilinu 2.500 til tíu þúsund vetrarbrautir eins og okkar til hýsa þær.

Ef við gefum okkur að verkamaður sé með um það bil 300 þúsund krónur útborgað í mánaðarlaun þá er ljóst að það myndi taka þennan tiltekna vinnuþjark um það bil 250 milljón ár að safna einum billjarð í sparibaukinn sinn.

En lítum nú á allra ríkustu einstaklinga veraldar:

Fremstur meðal jafningja er Carlos Slim Helu, eigandi fjölmiðlaveldisins Telecom. Hann er metinn á um 73 milljarða Bandaríkjadala.

Í öðru sæti er kunnuglegt nafn: Bill Gates, stofnandi og fyrrverandi stjórnarformaður Microsoft. Gates er metinn á um 67 milljarða dala.

Spænski tískufrömuðurinn Amancio Ortega er í þriðja sæti. Hann er stofnandi verslunarveldisins Zara og er metinn á 57 milljarða.

Ofurfjárfestirinn Warren Buffett og stjórnarformaður Berkshire Hathaway er í fjórða sæti með 53.5 milljarða dala.

Í fimmta sæti er Larry Ellison, stofnandi og forstjóri Oracle hugbúnaðarfyrirtækisins. Hann er metinn á 43 milljarða dala.

Í sjötta og sjöunda sæti eru bræðurnir Charles og David Koch en báðir eru metnir á um 34 milljarðar dala.

Li Ka-shing, auðkýfingurinn frá Hong Kong, er síðan metinn á 31 milljarð.

Liliane Bettencourt, erfingi L'Oreal snyrtivörufyrirtækisins er í níund sæti og er metin á 30 milljarða dala.

Franski viðskiptamaðurinn Bernard Arnault er í tíunda sæti, metinn á 29 milljarða dala.