Halldór í Holti hættur: Ég er hryggur

Halldór Gunnarsson í Holti sem verið hefur formaður fulltrúaráðs Sjálfstæðisfélaganna í Rangárvallasýslu hefur sagt sig úr Sjálfstæðisflokknum.  Halldór segir flokkinn hafa brugðist og hann hafi gengið hryggur af síðasta landsfundi. Flokkurinn sé ekki reiðubúinn að koma til móts við heimilin í landinu sem orðið hafa fyrir miklu eignatjóni eftir hrun.

Halldór Gunnarsson tilkynnti úrsögn sína úr Sjálfstæðisflokknum á stjórnarfundi fulltrúaráðsins í gær og sagði  af sér öllum trúnaðarstörfum fyrir flokkinn. Halldór er fyrrverandi sóknarprestur í Holti og tilkynnti í október síðastliðnum að hann hygðist bjóða sig fram til þingmennsku í Suðurkjördæmi.

Halldór vakti mikla athygli á nýafstöðnum Landsfundi Sjálfstæðisflokksins þegar hann bauð sig fram til formanns gegn Bjarna Benediktssyni en hætti svo við það og hvatti landsfundarfulltrúa til að kjósa Hönnu Birnu Kristjánsdóttur sem formann. Bjarni Benediktsson tók útspili Halldórs með jafnaðargeði og sagði styrk flokksins felast í því að menn gætu haft ólíkar skoðanir. Hann endaði svo ræðu sína með því að segja að sér þætti vænt um vin sinn Halldór Gunnarsson.

En Halldór er ósáttur og hefur sagt sig úr Sjálfstæðisflokknum.

„Á landsfundinum kom í ljós að mínu mati að flokkurinn er ekki tilbúinn að koma til móts við heimilin. Þess vegna fór ég heim svo hryggur að mér fannst yfirskrift fundarins Í þágu heimilanna vera háð," segir Halldór.

Halldór telur að á landsfundinum hefði þurft að koma fram skýr vilji flokksins til að breyta verðtryggingunni sem hafi hirt alla eignamyndun fólks eftir hrun.

„Á þessum tímamótum sem heimilin eru í dag, sem hafa misst allt sitt og unga fólkið, það verður að koma fram með það á skýran hátt. Mér finnst flokkurinn hafa brugðist og ekki vera sá flokkur sem ég gekk í fyrir fimmtíu árum."

Halldór hefur ekki gert upp sinn hug um hvort hann fari í annan flokk og segist taka eitt skref í einu.

„Ég er hryggur en ég er ekki í þeirri stöðu að vera hættur í þessari baráttu."