Athugað með akstur klukkan hálftvö

Klukkan hálftvö verður skoðað hvort hægt verði að hefja akstur strætisvagna á höfuðborgarsvæðinu. Strætisvagnaferðir hafa verið í lamasessi í allan dag vegna veðurs. Þá sinnir heimaþjónusta sveitarfélaganna einungis brýnustu erindum.

Heimaþjónustan í Kópavogi fellur niður í dag vegna ófærðar. Mikil röskun verður á þjónustu með heimsendan mat en reynt verður að sinna henni til þrautar, eftir því sem fram kemur frá Kópavogsbæ. Heimaþjónusta er aðstoð við þrif og heimilishald.

Unnið er að því að ryðja gatnakerfið í Kópavogi og hafa ruðningsbílar og gröfur verið að frá því klukkan hálf fjögur í nótt. Áhersla er lögð á stofnbrautir en einnig er stefnt að því að ryðja allar götur bæjarins. Göngustígar hafa enn ekki verið mokaðir þar sem svo fljótt snjóar yfir þá aftur.

Blindbylur er í efri byggðum bæjarins og er fólk beðið um að aka varlega og ekki vera á ferðinni nema brýna nauðsyn beri til.

----------

Uppfært klukkan 13:40

Strætó er ekki kominn af stað. Næst verður athugað með ferðir Strætó klukkan 15:30.