50 strandaglópar hjá Strætó

„Andrúmsloftið er þokkalegt," segir Reynir Jónsson, framkvæmdastjór Strætó, en um fimmtíu farþegar sitja fastir í höfuðstöðvum Strætó í Hesthálsi, skammt frá Ártúnsbrekkunni.

Um er að ræða farþega sem tóku strætó snemma í morgun, en vegna aðstæðna var ákveðið að öruggast væri að fara með þá upp í Hestháls í stað þess að halda áfram austur. Farþegarnir bíða nú í góðu yfirlæti eftir því að veðrinu sloti.

„Það er matsalur hérna og allir fengu að borða í hádeginu," segir Reynir. Verið er að endurskoða hvort hægt sé að hefja áætlunarferðir á ný, og segir Reynir að það sé gert í samráði við almannavarnir og lögreglu.

„Annars eru hér tveir jeppadellukarlar sem hafa þegar skutlað einhverjum upp í Grafarvog," segir Reynir en menn á vel búnum jeppum, eða ofurtrukkum eins og Reynir lýsir þeim sjálfur, hafa boðið srandaglópum far.

Fjöldinn allur af bílum eru fastir skammt frá, á Vesturlandsveginum. Ártúnsbrekkan er alveg veðurteppt. Lögreglan kemur skilaboðum áleiðis í gegnum Facebook-síðu sína en þar sagði meðal annars fyrr í dag að ef foreldrar eru búnir að bíða lengi, og eru með hungruð börn í bílnum, eru þeir hvattir til þess að hringja eftir hjálp í 112.