Vindur fer minnkandi í Reykjavík - Stormi spáð með suðurströndinni

„Veðrið á eftir að batna víðast hvar, nema kannski á suðurströndinni," segir Þorsteinn Jónsson, veðurfræðingur hjá Veðurstofu Íslands. Síðdegis gaf Veðurstofa út viðvörun en búist er við stormi eða roki á suður- og vesturlandi á morgun.

„Þetta á einna helst við um Eyjafjöll, Öræfasveit, Mýrdal og Kirkjubæjarklaustur. Þar verður veður svipað og það var í dag. Þá er einnig möguleiki á áframhaldandi öskufjúki í Skaftafellssýslu."

Borgarbúar fengu að kynnast veðurofsanum í dag, með tilheyrandi töfum á umferð og ófærð. Þorsteinn gerir þó ráð fyrir að vindur fari minnkandi á höfuðborgarsvæðinu.

„Já, það verður skafrenningur og fjúk en engin snjókoma. Vindur verður mikill á höfuðborgarsvæðinu en ekki jafn kröftugur og hann var í dag."

Aðspurður um framhaldið segir Þorsteinn að veðurhæð muni lækka hægt og rólega næstu daga.

„Það fer að draga úr þessu um helgina," segir Þorsteinn. „Og það er í raun þokkaleg spá fyrir næstu viku. Það verður vissulega kalt en lítil úrkoma."

Í meðfylgjandi myndskeiði má sjá hvernig höfuðborgarbúar brugðust við óveðrinu í dag. Þegar neyðin er stærst eru björgunarsveitirnar líka yfirleitt næstar.